臺文漢字版本

進前彼篇文章予人講看無，顯示一般看漢字的人預設彼文章是華語的。但是佇咧台灣推捒本土語言教育的狀況，其實是有可能是寫台文佮客人話文章。這爿囥一寡臺語教學的網站佮書予袂曉臺語的人參考：

• 臺灣閩南語羅馬字拼音教學網
• 台語學習網路資源

這幾年台灣的OpenStreetMap社群嘛有重視濟語言的工課，先共重要的都市庄頭標示台語佮客語的名號，甚至是原住民區的部落，嘛標示𪜶族語的名號。

看無毋捌意思的漢字文章毋是真大的代誌，無受著相關的語言教育的人誠自然就毋捌，乖乖請人抑是倩人來翻譯就好矣。較熟似香港文化的人，嘛看會著粵語字。

頭前講著OpenStreetMap的濟語言標示，毋但是國際西洋的語言，嘛愛處理在庄的本土語言。這幾年咱的社群愈來愈重視，共縣市，鄉鎮市區，甚至是角頭的小地號名嘛加上台語名號。車頭，捷運站，重要的公車轉運站嘛是加上台語名號。不而過客語較無法度，愛有客人參與，這馬客人較無貢獻。

• name:nan
• name:nan-HJ
• name:nan-POJ
• name:nan-TL
• name:hak

國外西洋的地號名的部份，有固有的地號名就用固有的，親像Russia翻做露西亞。原住民的部份，因為in有完整的部落清單佮羅馬字寫法，所以會當沓沓仔共𪜶的地號名加上本底的GNS地號名遐，就是愛有人做。歡迎有興趣的人來幫贊鬥陣來完成。

Tâi-lô pán-pún

Tsìn-tsîng hit-phinn bûn-tsiong hōo-lâng kóng khuànn-bô, hián-sī it-puann khuànn hàn-jī ê lâng ū-siat hit bûn-tsiong sī huâ-gú ê. Tān-sī tī-teh Tâi-uân thui-sak pún-thóo gū-giân kàu-io̍k ê tsōng-hóng, kî-si̍t sī ū-khó-lîng sī siá Tâi-bûn kah Kheh-lâng-uē bûn-tsiong. Tsit-pîng khǹg tsi̍t-kuá Tâi-gú kàu-ha̍k ê bāng-tsām kah tsu hōo buē-hiáu Tâi-gú ê lâng tsham-khó:

• Tâi-uân Bân-lâm-gú lô-má-jī phing-im kàu-ha̍k-bāng
• Tâi-gú ha̍k-si̍p bāng-lōo tsu-guân

Tsit-kuí-nî Tâi-uân ê OpenStreetMap siā-kûn mā-ū tiōng-sī tsuē-gū-giân ê khang-khuè, sian kā tiōng-iàu-ê too-tshī tsng-thâu piáu-sī Tâi-gú kah Kheh-gú ê miâ-hō, sīm-tsì sī guân-tsū-bîn-khu ê pōo-lo̍k, mā piáu-sī in tso̍k-gú ê miâ-hō.

Khuànn-bô m̄-bat i-su ê hàn-jī bûn-tsiong m̄-sī tsin-tuā ê tāi-tsì, bô-siū-tio̍h siong-kuan gū-giân kàu-io̍k ê lâng tsiânn tsū-jiân tō m̄-bat, kuai-kuai tshiánn-lâng ia̍h-sī tshiànn-lâng lâi huan-i̍k tō-hó–ah. Khah-si̍k-sāi Hiong-káng bûn-huà ê lâng, mā khàunn ē tio̍h Ua̍t-gú-jī.

Thâu-tsîng kóng-tio̍h OpenStreetMap ê tsuē-gū-giân piáu-sī, m̄-nā sī kok-tsè se-iûnn ê gū-giân, mā-ài tshú-lí tsāi-tsng ê pún-thóo gū-giân. Tsit-kuí-nî lán-ê siā-kûn jú-lâi-jú tiōng-sī–ah kā kuān-tshī, hiong-tìn-tshī-khu, sīm-tsì sī kak-thâu ê sió tuē-hō-miâ ka-siōng Tâi-gú miâ-hō. Tshia-thâu, tsia̍t-ūn-tsām, Tiōng-iàu ê kong-tshia-tsuán-ūn-tsām mā-sī ka-siōng Tâi-gú miâ-hō. Put-jî-kò Kheh-gú khah bô-huat-tōo, ài-ū Kheh-lâng tsham-ú, tsit-má Kheh-lâng khah bô kòng-hiàn.

• name:nan
• name:nan-HJ
• name:nan-POJ
• name:nan-TL
• name:hak

Kok-guā se-iûnn ê tuē-hō-miâ ê pōo-hūn, ū kòo-iú ê tuē-hō-miâ tō iōng kòo-iú ê, tshin-tshiūnn Russia huan-tsuè Lōo-se-a. Guân-tsū-bîn ê pōo-hūn, in-uī in-ū uân-tsíng ê pōo-lo̍k tshing-tuann kah Lô-má-jī siá-huat, sóo-í ē-tàng ta̍uh-ta̍uh-á kā in-ê tuē-hō-miâ ka-siōng pún-tué ê GNS tuē-hō-miâ hiah, tio̍h-sī ài ū-lâng tsuè, Huan-gîng ū-hìng-tshù ê lâng lâi pang-tsān tàu-tīn lâi uân-sîng.

Pe̍h-ōe-jī Pán-pún

Chìn-chêng hit-phiⁿ bûn-chiong hō͘-lâng kóng khòaⁿ-bô, hián-sī it-poaⁿ khòaⁿ hàn-jī ê lâng ū-siat hit bûn-chiong sī hôa-gú ê. Tān-sī tī-teh Tâi-oân thui-sak pún-thó͘ gū-giân kàu-io̍k ê chōng-hóng, kî-si̍t sī ū-khó-lêng sī siá Tâi-bûn kah Kheh-lâng-ōe bûn-chiong. Chit-pêng khǹg chi̍t-kóa Tâi-gú kàu-ha̍k ê bāng-chām kah chu hō͘ bōe-hiáu Tâi-gú ê lâng chham-khó:

• Tâi-oân Bân-lâm-gú lô-má-jī pheng-im kàu-ha̍k-bāng

• Tâi-gú ha̍k-si̍p bāng-lō͘ chu-goân

Chit-kúi-nî Tâi-oân ê OpenStreetMap siā-kûn mā-ū tiōng-sī chōe-gū-giân ê khang-khòe, sian kā tiōng-iàu-ê to͘-chhī chng-thâu piáu-sī Tâi-gú kah Kheh-gú ê miâ-hō, sīm-chì sī goân-chū-bîn-khu ê pō͘-lo̍k, mā piáu-sī in cho̍k-gú ê miâ-hō.

Khòaⁿ-bô m̄-bat i-su ê hàn-jī bûn-chiong m̄-sī chin-tōa ê tāi-chì, bô-siū-tio̍h siong-koan gū-giân kàu-io̍k ê lâng chiâⁿ chū-jiân tō m̄-bat, koai-koai chhiáⁿ-lâng ia̍h-sī chhiàⁿ-lâng lâi hoan-e̍k tō-hó–ah. Khah-se̍k-sāi Hiong-káng bûn-hòa ê lâng, mā khàuⁿ ē tio̍h Oa̍t-gú-jī.

Thâu-chêng kóng-tio̍h OpenStreetMap ê chōe-gū-giân piáu-sī, m̄-nā sī kok-chè se-iûⁿ ê gū-giân, mā-ài chhú-lí chāi-chng ê pún-thó͘ gū-giân. Chit-kúi-nî lán-ê siā-kûn jú-lâi-jú tiōng-sī–ah kā koān-chhī, hiong-tìn-chhī-khu, sīm-chì sī kak-thâu ê sió tōe-hō-miâ ka-siōng Tâi-gú miâ-hō. Chhia-thâu, chia̍t-ūn-chām, Tiōng-iàu ê kong-chhia-choán-ūn-chām mā-sī ka-siōng Tâi-gú miâ-hō. Put-jî-kò Kheh-gú khah bô-hoat-tō͘, ài-ū Kheh-lâng chham-ú, chit-má Kheh-lâng khah bô kòng-hiàn.

• name:nan
• name:nan-HJ
• name:nan-POJ
• name:nan-TL
• name:hak

Kok-gōa se-iûⁿ ê tōe-hō-miâ ê pō͘-hūn, ū kò͘-iú ê tōe-hō-miâ tō iōng kò͘-iú ê, chhin-chhiūⁿ Russia hoan-chòe Lō͘-se-a. Goân-chū-bîn ê pō͘-hūn, in-ūi in-ū oân-chéng ê pō͘-lo̍k chheng-toaⁿ kah Lô-má-jī siá-hoat, só͘-í ē-tàng tau̍h-tau̍h-á kā in-ê tōe-hō-miâ ka-siōng pún-tóe ê GNS tōe-hō-miâ hiah, tio̍h-sī ài ū-lâng chòe, Hoan-gêng ū-hèng-chhù ê lâng lâi pang-chān tàu-tīn lâi oân-sêng.