最近佇咧 OSM dialy 遐有人寫文章，認為 talk-tw 的討論變矣，傷排外用手段阻止編輯。我佇咧想你敢是佮我看仝款的 mailing list，這幾年大都是 weeklyOSM 的出版公告，猶閣有匯入佮大量編輯的通告，確定逐家無問題就動手來做，講實在是無啥物咧討論。

古早時代 talk-tw mailing list 有社群進行串聯熟似彼此，制定臺灣各級行政區的標籤方式，欲社群聚會的時間討論等等重要的議題。後來真濟討論走去較濟人的 Facebook 社團遐，mailing list 就無啥人用。

社群討論不論是佇咧佗位，毋就是欲出聲討論，逐家攏有無仝看法佮做法，提出來嘛會當修正，嘛無看著有其他人的意見 。社群機制親像臺灣原住民區域遐的部落會議，進前亞泥佮在地部落欲諮詢部落敢會當繼續開採礦場，欲開部落會議來投票，過程有好好討論就好，來爭取各方支持。

在地力量在地社群辛辛苦苦咧維護，揣𪜶討論，應該毋是傷過份的代志。進前嘛有外國公司，一个 Snap 想欲模仿 Google 按呢佇 OpenStreetMap 遐存各國認為的「國家」邊界，臺灣予𪜶認為是中國的，所以愛有一个中國認為的臺灣是𪜶的邊界，予社群認為無共識閣爭議傷濟予阻止。採取較激烈的手段是欲為著落尾的討論來起頭，因為好好佇咧編織討論留話，真濟擺是無人回的。

嘛有公司推捒無啥問題的物件，親像 Here 創臺灣的 Maprouttle Challenge 修正臺灣遮的地圖小問題，Apple 嘛有用 Maprouttle Challenge 希望社群有人會當鬥跤手來修正地圖的問題。

我遮有共 Talk-tw 當做愛發文來吸引人來回的目的，社群莫干焦一个所在討論，另外一方面是欲記錄，因為 Facebook 討論濟，毋過無好揣，寄批信到 mailing list 留記錄。