• 台灣華語版本：https://www.openstreetmap.org/user/s8321414/diary/399202
• English Version: https://www.openstreetmap.org/user/assanges/diary/399210

臺文漢字版本

開放街圖臺灣社群（OpenStreetMap 臺灣社群）誠歡喜爭取到維基媒體基金會的聯盟補助，主要欲買兩台 Insta360 One X2 相機（佮相關的配件），猶閣有規劃對2022年3月開始，一直到2023年2月的街景踏查團佮對應的編輯工作坊活動。咱欲辦理六擺實地踏查佮至少六擺的編輯工作坊。社群成員欲共360相機囥佇汽車車頂，若開車若翕360相片，翕猶未翕著街景的所在。翕了後佇咧電腦前，閣來若看翕的相片，若編輯 OpenStreetMap 共編地圖添加資料，猶有共路途中間經過的景緻佮在庄聚落，共相關相片上傳到 Wiki Commons 多媒體站。

社群頭起先佇2022年3月19號先佇台北的摩茲工寮舉辦踏查團的前導工作坊，頂個月（也就是2022年4月）24號舉辦第一改的街景踏查團，佇咧取車抑是自駕到位時，先佇咧央北重劃區安裝翕相機佮試翕，4台車攏總11个人出發欲去基隆、金山、萬里等行政區，其中翕國道三號部份欠缺街景的路段。路途當中佇仙洞隧道歇停，毋過干焦翕磅空兩爿的磅空口，磅空本體目前是無法度入去的。閣來一陣人分做去仙洞巖佮迴車塔。仙洞嚴彼組是入去廟內的一線天，不而過燈火較暗翕的效果無蓋好。迴車塔彼組是翕台灣較罕得看的人工車道斜坡。後來咱去大武崙漁港附近會合，歇睏時補充熱量佮水份，仝一个時間觀察週末的海沙埔佇疫情影響之下，嘛是有足濟民眾佇海沙埔耍水。

中晝佮下晡時間去金山老街等所在踅踅，佇水尾漁港揣食的佮踏查取材。猶有到金山老街品嘗芋圓美味了後，閣兵分多路轉去台北。

OpenStreetMap 台灣預計佇本月（2022年5月）22號仝款佇摩茲工寮舉辦第一次的街景踏查團編輯工作坊，活動當中會利用事先上傳到 Mapillary、KartaView 等開放的街景網站的相片來編輯 OpenStreetMap（變更集將會帶有 #streetsurveyTW 主題標籤），嘛會對翕的相片當中揀選部份景點抑是維基媒體計畫中無照片或當地相片真舊猶未更新，共新翕的相片上傳到維基共享資源，仝時嘛會當利用上傳到維基共享資源的相片來編寫維基百科、維基導遊抑是維基數據等維基媒體專案。歡迎有興趣的人報名參與！

咱向望開放街圖佮維基媒體等等開放內容的計畫會當愈來愈好，產出閣較濟高品質的資料！

有關聯盟補助的代誌

2021年第四季時，維基媒體基金會公佈新的補助方案：維基媒體聯盟補助，這項補助會資助佮維基媒體計畫有關的專案，毋過並毋是各地的維基媒體自治體提出的提案。

有關 OpenStreetMap 臺灣的代誌

OpenStreetMap 臺灣由臺灣關心投入 OpenStreetMap 的編輯者構成，自 2010 年開始對個人獨編輯變成集合閣較濟人參與的共編地圖專案的在地社群。目前佇臺灣有佇台北佮 Wikidata 社群共同舉行 OpenStreetMap x Wikidata 月聚，嘛有不定期的踏查活動。

本文感謝 Supaplex 協助校對並翻譯成台文版，英文版由 assanges 翻譯，並以姓名標示-相同方式分享 4.0 國際授權。

Tâi-lô pán-pún

Khai-hóng Kue-tôo Tâi-uân Siā-kûn（OpenStreetMap Tâi-uân Siā-kûn）tsiânn huann-hí tsing-tshú kàu Uî-ki Muî-thé Ki-kim-huē ê Liân-bîng Póo-tsōo, tsú-iàu bueh bué nn̄g-tâi Insta360 One X2 hip-siòng-ki (Kah siong-kuan ê phuè-kiānn), iáu-koh-ū kui-uē tuì 2022-nî 3–ge̍h khai-sí, it-ti̍t kàu 2023-nî 2–ge̍h ê kue-kíng tah-tshâ-thuân kah tuì-ìng ê pian-tsi̍p kang-tsok-hong ua̍h-tōng. Lán-bueh pān-lí la̍k-pái si̍t-tuē tah-tsâ kah tsì-tsió la̍k-pái ê pian-tsi̍p kang-tsok-hong. Siā-kûn sîng-uân bueh kā 360 hip-siòng-ki khǹg tī khì-tshia tshia-tíng, nā khui-tshia nā hip 360 siòng-phìnn, hip iah-bē hip-tio̍h kue-kíng ê sóo-tsāi. hip liáu-āu tī tiān-náu tsîng, koh-lâi nā khuànn hip–ê siòng-phìnn, nā pian-tsi̍p OpenStreetMa kiōng pian tuē-tôo thiam-ka tsu-liāu, iáu-ū kā lōo-tôo tiong-kan king-kè ê kíng-tì kap tsāi-tsng tsu-lo̍h, kā siong-kuan siòng-phìnn siōng-thuân kàu Wiki Commons to-muî-thé-tsām.

Siā-kûn thâu-khí-sing tī 2022-nî 3–ge̍h 19-hō sian tī Tâi-pak ê MozSpac kú-pān tah-tsâ-thuân ê tsîng-tō kang-tsok-hong, tíng-kò-ge̍h (iā tio̍h-sī 2022-nî 4–ge̍h) 24-hō kú-pān tē-it-kái ê kue-kíng tah-tsâ-thuân, tī-teh tshú-tshia ia̍h-sī tsū-kà kàu-uī liáu-āu, sian tī-teh Iong-pak tíng-uē-khu an-tsong hip-siòng-ki kah tshì-hip, 4-tâi tshia lóng-tsóng 11-ê-lâng tshut-huat bueh-khì Ke-lâng、bān-lí、kim-san tíng hîng-tsìng-khu, kî-tiong hip Kok-tō 3-hō pōo-hūn khiàm-khuat kue-kíng ê lōo-tuānn. lōo-tôo tang-tiong tī Sian-tōng Pōng-khang hio̍h-thîng, m̄-koh kan-na hip pōng-khang nn̄g-pîng ê pōng-khang-kháu,pōng-khang pún-thé bo̍k-tsîng sī bô-huat-tōo ji̍p-khì–ê. Koh-lâi tsit-tīn-lâng hun-tsuè-khì Sian-tōng-giâm kah huê-tshia-thah. Sian-tōng-giâm hit-tsoosī ji̍p-khì biō-lāi ê tsi̍t-suànn-thinn, put-jî-kò lāi-tué ê ting-hé khah-àm, hip ê hāu-kó bô-kài-hó. Huê-tshia-thah hit-tsoo sī hip Tâi-uân khah hán-tit-khuànn ê jîn-kang tshia-tō tshiâ-pho. Āu-lâi lán-khì Tuā-bú-lūn Hîr-gáng hù-kūn huē-ha̍p, hioh-khùn sî póo-tshiong jia̍t-liōng kah tsuí-hūn, kâng-tsi̍t-ê sî-kan kuan-tshat tsiu-bua̍h ê hái-sua-poo tī i̍k-tsîng íng-hióng tsi-hā, mā-sī ū tsiok-tsuē bîn-tsiòng tī hái-sua-poo sńg-tsuí.

Tiong-tàu kah ē-poo sî-kan khì Kim-san Lāu-kue tíng sóo-tsāi se̍h-se̍h–leh, tī Tsuí-bué Hîr-káng tshē tsia̍h-ê kah tah-tshâ tshú-tsâi. Iáu-ū kàu Kim-san Lāu-kue phín-siông Ōo-înn Bí-bī liáu-āu, koh ping-hun to-lōo tńg-khì Tâi-pak.

OpenStreetMap Tâi-uân ū-kè tī pún-ge̍h (2022-nî 5–ge̍h) 22-hō kâng-khuán tī MozSpce kú-pān tē-it-pái ê kue-kíng tah-tshâ-thuân pian-tsi̍p kang-tsok-hong, ua̍h-tōng hit-kang ē lī-iōng sū-sian siōng-thuân kàu Mappillary, KartaView tíng khai-hòng ê kue-kíng bāng-tsām ê siòng-phìnn lâi pian-tsi̍p OpenStreetMap (piàn-king-tsi̍p tsiong-ē tài-ū #streetsurveyTW tsú-tê piau-tshiam), mā ē tuì hip-ê siòng-phìnn tang-tiong kíng-suán pōo-hūn kíng-tiám ia̍h-sī Uî-ki muî-thé kè-uē tiong bô siòng-phìnn ia̍h-sī tong-tuē siòng-phìnn tsin-kū iah-bē king-sin, kā sin hip ê siòng-phìnn siōng-thuân kàu Uî-ki Kiōng-hiáng tsu-guân, kâng-sî mā ē-tàng lī-iōng siōng-thuân kàu Uî-ki Kiōng-hiáng tsu-guân ê siòng-phìnn lâi pian-siá Uî-ki Pah-kho, Uî-ki Tō-iû ia̍h-sī Uî-ki sòo-kù tíng Uî-ki Muî-thé tsuan-àn. Huan-gîng ū hìng-tshù ê lâng pò-miâ tsham-ú！

Lán ǹg-bāng Khai-hòng Kue-tôo kah Uî-ki Muî-thé tíng-tíng khai-hòng luē-iông ê kè-uē ē-tàng jú-lâi-jú-hó, sán-tshut koh-khah tsuē ko-phín-tsit ê tsu-liāu!

iú-kuan liân-bîng póo-tsōo ê tāi-tsì

2021-nî tē-4-kuì sî,Uî-ki Muî-thé Ki-kim-huē kong-pòo sin-ê póo-tsōo hong-àn: Uî-ki Muî-thé Liân-bîng póo-tsōo, tsit-hāng póo-tsōo ē tsàn-tsōo kah Uî-ki Muî-thé kè-uē iú-kuan ê tsuan-àn, m̄-koh pīng m̄-sī kok-tuē ê Uî-ki Muî-thé tsū-tī-thé the̍h-tshut ê thê-àn.

iú-kuan OpenStreetMap Tâi-uân ê tāi-tsì

OpenStreetMap Tâi-uân iû Tâi-uân kuan-sim tâu-ji̍p OpenStreetMap ê pian-tsi̍p-tsiá kòo-sîng, tsū 2010-nî khai-sí tuì kò-jîn to̍k pian-tsi̍p piàn-sîng tsi̍p-ha̍p koh-khah tsuē lâng tsham-ú ê kiōng-pian tuē-tôo tsuan-àn ê tsāi-tuē siā-kûn. Bo̍k-tsîng tī Tâi-uân ū tī Tâi-pak kah Wikidata siā-kûn kiōng-tông kú-hîng OpenStreetMap x Wikidata ge̍h-tsū, mā-ū put-tīng-kî ê tah-tshâ ua̍h-tōng.

Pún-bûn kám-siā Supaplex hia̍p-tsōo kàu-tuì pīng huan-i̍k Tâi-bûn pán-pún, Ing-bûn pán sī assanges huan-i̍k, tsuân-pōo bûn-tsiong iōng sìng-bîng piáu-sī-kâng-khuán hong-sik hun-hióng 4.0 kok-tsè siū-khuân.

Pe̍h-ōe-jī pán-pún

Khai-hóng Koe-tô͘ Tâi-oân Siā-kûn（OpenStreetMap Tâi-oân Siā-kûn）chiâⁿ hoaⁿ-hí cheng-chhú kàu Ûi-ki Mûi-thé Ki-kim-hōe ê Liân-bêng Pó͘-chō͘, chú-iàu boeh bóe nn̄g-tâi Insta360 One X2 hip-siòng-ki (Kah siong-koan ê phòe-kiāⁿ), iáu-koh-ū kui-ōe tùi 2022-nî 3–ge̍h khai-sí, it-ti̍t kàu 2023-nî 2–ge̍h ê koe-kéng tah-chhâ-thoân kah tùi-èng ê pian-chi̍p kang-chok-hong oa̍h-tōng. Lán-boeh pān-lí la̍k-pái si̍t-tōe tah-châ kah chì-chió la̍k-pái ê pian-chi̍p kang-chok-hong. Siā-kûn sêng-oân boeh kā 360 hip-siòng-ki khǹg tī khì-chhia chhia-téng, nā khui-chhia nā hip 360 siòng-phìⁿ, hip iah-bē hip-tio̍h koe-kéng ê só͘-chāi. hip liáu-āu tī tiān-náu chêng, koh-lâi nā khòaⁿ hip–ê siòng-phìⁿ, nā pian-chi̍p OpenStreetMa kiōng pian tōe-tô͘ thiam-ka chu-liāu, iáu-ū kā lō͘-tô͘ tiong-kan keng-kè ê kéng-tì kap chāi-chng chu-lo̍h, kā siong-koan siòng-phìⁿ siōng-thoân kàu Wiki Commons to-mûi-thé-chām.

Siā-kûn thâu-khí-seng tī 2022-nî 3–ge̍h 19-hō sian tī Tâi-pak ê MozSpac kú-pān tah-châ-thoân ê chêng-tō kang-chok-hong, téng-kò-ge̍h (iā tio̍h-sī 2022-nî 4–ge̍h) 24-hō kú-pān tē-it-kái ê koe-kéng tah-châ-thoân, tī-teh chhú-chhia ia̍h-sī chū-kà kàu-ūi liáu-āu, sian tī-teh Iong-pak téng-ōe-khu an-chong hip-siòng-ki kah chhì-hip, 4-tâi chhia lóng-chóng 11-ê-lâng chhut-hoat boeh-khì Ke-lâng、bān-lí、kim-san téng hêng-chèng-khu, kî-tiong hip Kok-tō 3-hō pō͘-hūn khiàm-khoat koe-kéng ê lō͘-tōaⁿ. lō͘-tô͘ tang-tiong tī Sian-tōng Pōng-khang hio̍h-thêng, m̄-koh kan-na hip pōng-khang nn̄g-pêng ê pōng-khang-kháu,pōng-khang pún-thé bo̍k-chêng sī bô-hoat-tō͘ ji̍p-khì–ê. Koh-lâi chit-tīn-lâng hun-chòe-khì Sian-tōng-giâm kah hôe-chhia-thah. Sian-tōng-giâm hit-tsoosī ji̍p-khì biō-lāi ê chi̍t-sòaⁿ-thiⁿ, put-jî-kò lāi-tóe ê teng-hé khah-àm, hip ê hāu-kó bô-kài-hó. Hôe-chhia-thah hit-cho͘ sī hip Tâi-oân khah hán-tit-khòaⁿ ê jîn-kang chhia-tō chhiâ-pho. Āu-lâi lán-khì Tōa-bú-lūn Hîr-gáng hù-kūn hōe-ha̍p, hioh-khùn sî pó͘-chhiong jia̍t-liōng kah chúi-hūn, kâng-chi̍t-ê sî-kan koan-chhat chiu-boa̍h ê hái-soa-po͘ tī e̍k-chêng éng-hióng chi-hā, mā-sī ū chiok-chōe bîn-chiòng tī hái-soa-po͘ sńg-chúi.

Tiong-tàu kah ē-po͘ sî-kan khì Kim-san Lāu-koe téng só͘-chāi se̍h-se̍h–leh, tī Chúi-bóe Hîr-káng chhē chia̍h-ê kah tah-chhâ chhú-châi. Iáu-ū kàu Kim-san Lāu-koe phín-siông Ō͘-îⁿ Bí-bī liáu-āu, koh peng-hun to-lō͘ tńg-khì Tâi-pak.

OpenStreetMap Tâi-oân ū-kè tī pún-ge̍h (2022-nî 5–ge̍h) 22-hō kâng-khoán tī MozSpce kú-pān tē-it-pái ê koe-kéng tah-chhâ-thoân pian-chi̍p kang-chok-hong, oa̍h-tōng hit-kang ē lī-iōng sū-sian siōng-thoân kàu Mappillary, KartaView téng khai-hòng ê koe-kéng bāng-chām ê siòng-phìⁿ lâi pian-chi̍p OpenStreetMap (piàn-keng-chi̍p chiong-ē tài-ū #streetsurveyTW chú-tê piau-chhiam), mā ē tùi hip-ê siòng-phìⁿ tang-tiong kéng-soán pō͘-hūn kéng-tiám ia̍h-sī Ûi-ki mûi-thé kè-ōe tiong bô siòng-phìⁿ ia̍h-sī tong-tōe siòng-phìⁿ chin-kū iah-bē keng-sin, kā sin hip ê siòng-phìⁿ siōng-thoân kàu Ûi-ki Kiōng-hiáng chu-goân, kâng-sî mā ē-tàng lī-iōng siōng-thoân kàu Ûi-ki Kiōng-hiáng chu-goân ê siòng-phìⁿ lâi pian-siá Ûi-ki Pah-kho, Ûi-ki Tō-iû ia̍h-sī Ûi-ki sò͘-kù téng Ûi-ki Mûi-thé choan-àn. Hoan-gêng ū hèng-chhù ê lâng pò-miâ chham-ú！

Lán ǹg-bāng Khai-hòng Koe-tô͘ kah Ûi-ki Mûi-thé téng-téng khai-hòng lōe-iông ê kè-ōe ē-tàng jú-lâi-jú-hó, sán-chhut koh-khah chōe ko-phín-chit ê chu-liāu!

iú-koan liân-bêng pó͘-chō͘ ê tāi-chì

2021-nî tē-4-kùi sî,Ûi-ki Mûi-thé Ki-kim-hōe kong-pò͘ sin-ê pó͘-chō͘ hong-àn: Ûi-ki Mûi-thé Liân-bêng pó͘-chō͘, chit-hāng pó͘-chō͘ ē chàn-chō͘ kah Ûi-ki Mûi-thé kè-ōe iú-koan ê choan-àn, m̄-koh pēng m̄-sī kok-tōe ê Ûi-ki Mûi-thé chū-tī-thé the̍h-chhut ê thê-àn.

iú-koan OpenStreetMap Tâi-oân ê tāi-chì

OpenStreetMap Tâi-oân iû Tâi-oân koan-sim tâu-ji̍p OpenStreetMap ê pian-chi̍p-chiá kò͘-sêng, chū 2010-nî khai-sí tùi kò-jîn to̍k pian-chi̍p piàn-sêng chi̍p-ha̍p koh-khah chōe lâng chham-ú ê kiōng-pian tōe-tô͘ choan-àn ê chāi-tōe siā-kûn. Bo̍k-chêng tī Tâi-oân ū tī Tâi-pak kah Wikidata siā-kûn kiōng-tông kú-hêng OpenStreetMap x Wikidata ge̍h-chū, mā-ū put-tēng-kî ê tah-chhâ oa̍h-tōng.

Pún-bûn kám-siā Supaplex hia̍p-chō͘ kàu-tùi pēng hoan-e̍k Tâi-bûn pán-pún, Eng-bûn pán sī assanges hoan-e̍k, choân-pō͘ bûn-chiong iōng sèng-bêng piáu-sī-kâng-khoán hong-sek hun-hióng 4.0 kok-chè siū-khoân.